આજે વધામણાં રે ચંપારણ્ય

આજે વધામણાં રે, ચંપારણ્ય ધામમાં,

પ્રગટ્યા શ્રી વલ્લભરાય, વધામણાં રે - ચંપારણ્ય

વૈશાખ માસ ને વદિ એકાદશી,

શુભ નક્ષત્ર શુભ વાર, વધામણાં રે - ચંપારણ્ય

તાત લક્ષ્મણ ભટ્ટ હૈયામાં હરખ્યા,

હરખ્યા શ્રી ઈલ્લમાજી માત, વધામણાં રે - ચંપારણ્ય

સોનાને પારણે લાલ ને ઝુલાવીયા,

નંદ મહોસ્તસવ કીધો, વધામણાં રે - ચંપારણ્ય

ભાંત ભાંતના ભોગ ધરાવીયા,

વૈષ્ણવને પ્રસાદ લેવરાવ્યા, વધામણાં રે - ચંપારણ્ય

નોબત નગારા ને વાજિંત્રો વાગે,

માનિની મંગલ ગાય, વધામણાં રે - ચંપારણ્ય

કદલીના સ્તંભ બેની રોપ્યા છે આંગણે,

તોરણ બાંધ્યા છે દ્વાર, વધામણાં રે - ચંપારણ્ય

દેવના તે દુંદુભિ વાગે આકાશમાં,

પુષ્પની વૃષ્ટિ થાય, વધામણાં રે - ચંપારણ્ય

સગાં કુટુંબીને સ્નેહે તેડાવિયા,

વરત્યો છે જય જયકાર, વધામણાં રે - ચંપારણ્ય

ભાંત ને ભાંતના લાડ લડાવિયાં,

હંસી હંસી ગોદ ખેલાવ્યા, વધામણાં રે - ચંપારણ્ય

વિદ્યા અલૌકિક આપ ભણ્યા છે,

પુષ્ટિસિદ્ધાંત સમજાવ્યા, વધામણાં રે - ચંપારણ્ય

વ્રજમંડલમાં આપ બિરાજિયા,

સેવ્યા શ્રીગોવર્ધનનાથ, વધામણાં રે - ચંપારણ્ય

પરમ ઉદાર આપ દયાના સાગર,

વચનામૃત વરસાવ્યાં, વધામણાં રે - ચંપારણ્ય

વેણુગીત યુગલગીત સુંદર સુબોધિની,

રસભર્યા ગ્રંથ રચાવ્યાં, વધામણાં રે - ચંપારણ્ય

પૃથ્વી પરિક્રમા ત્રણ કરીને,

અનેક જીવ શરણ લીધા, વધામણાં રે - ચંપારણ્ય

નામ-નિવેદન શ્રીજી ને સનમુખ,

આપી સેવાનાં સુખ દીધાં, વધામણાં રે - ચંપારણ્ય

'રસિકપ્રિયા' કર જોડી કહે છે,

આપો શ્રી વ્રજમાં વાસ, વધામણાં રે - ચંપારણ્ય