મારા તે બાગમાં ગુલાબના છોડ

મારા તે બાગમાં ગુલાબના છોડ છે

મહેકે છે મોગરો અપાર રે, રમવા આવો સાહેલડી

મારા તે બાગમાં નાચે મોરલિયા

કોયલડી કરે ટહુકાર રે – રમવા

મારા તે બાગમાં ભરિયા સરોવર

ફુલ્યા છે ફૂલ ઘણી ભાત રે – રમવા

મારા તે બાગમાં ગજરા ગુંજાવશું

દેશું પ્રીતમજી ને હાથ રે – રમવા

મારા તે બાગમાં હિંચકા બંધાવશું

વેણી ભરાવું સખી સાથ રે – રમવા

મારા તે બાગમાં વ્હેલા વ્હેલા આવજો

ગરબે રમવાને બહેની આવજે રે – રમવા

મારા તે બાગમાં કરશું ગોઠલડી

જમશું સુંદરવર સાથ રે – રમવા

મારા તે બાગમાં મળશે મોહની

‘રસિક’ પ્રીતમ વ્રજનાથ રે – રમવા